മധുരക്കിഴങ്ങ് കൊണ്ട് പലവിധ വിഭവങ്ങൾ തയ്യാറാക്കാറുണ്ടെങ്കിലും എരിവും പുളിയും മധുരവും ഒരുമിച്ച് ചേർന്ന ഈ ഫ്രൈ ഒരിക്കൽ കഴിച്ചാൽ വീണ്ടും വീണ്ടും ഉണ്ടാക്കാൻ തോന്നും. ചായക്കൊപ്പമോ ഉച്ചഭക്ഷണത്തിനൊപ്പമോ കഴിക്കാൻ പറ്റിയ എളുപ്പവും രുചികരവുമായ ഒരു റെസിപ്പിയാണിത്.
ആദ്യം മധുരക്കിഴങ്ങ് നന്നായി കഴുകി മണ്ണെല്ലാം നീക്കം ചെയ്ത ശേഷം വലിയ കഷണങ്ങളാക്കി മുറിക്കുക. ഒരു പാത്രത്തിൽ ആവശ്യത്തിന് വെള്ളവും ഉപ്പും ചേർത്ത് മധുരക്കിഴങ്ങ് വേവിച്ചെടുക്കുക. വെന്ത ശേഷം വെള്ളം പൂർണമായി വാർത്ത് ചൂടാറിയാൽ തൊലി നീക്കി ചെറിയ കഷണങ്ങളായി മുറിച്ചെടുക്കുക.
ഒരു പാനിൽ വെളിച്ചെണ്ണ ചൂടാക്കി മുറിച്ചുവെച്ച മധുരക്കിഴങ്ങ് കഷണങ്ങൾ ഇട്ട് സ്വർണനിറമാകുന്നതുവരെ പൊരിച്ചെടുക്കുക. മറ്റൊരു പാനിൽ വെളിച്ചെണ്ണ ഒഴിച്ച് സവാള, പച്ചമുളക്, കറിവേപ്പില എന്നിവ വഴറ്റിയ ശേഷം ആവശ്യത്തിന് ഉപ്പ്, ഒരു നുള്ള് മഞ്ഞൾപ്പൊടി, ഇടിച്ച മുളക് എന്നിവ ചേർത്ത് നന്നായി ഇളക്കുക. തുടർന്ന് പൊരിച്ചുവെച്ച മധുരക്കിഴങ്ങ് ചേർത്ത് എല്ലാ മസാലയും ഒരുപോലെ പിടിക്കുന്നതുവരെ യോജിപ്പിക്കുക.
അവസാനമായി കുറച്ച് നാരങ്ങാനീര് ചേർത്താൽ രുചി കൂടുതൽ മികച്ചതാകും. പുറത്ത് ചെറുതായി ക്രിസ്പിയും ഉള്ളിൽ സോഫ്റ്റുമായ ഈ മധുരക്കിഴങ്ങ് ഫ്രൈ കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടുന്ന ഒരു വിഭവമാണ്. ചൂടോടെ തന്നെ വിളമ്പിയാൽ ഏറ്റവും മികച്ച രുചി ലഭിക്കും. credit : Jaya’s Recipes