ചൂടുകാലത്ത് ഒരു ഗ്ലാസ് തണുത്ത നാരങ്ങാവെള്ളം എല്ലാവർക്കും ഇഷ്ടമാണ്. എന്നാൽ ഓരോ തവണയും നാരങ്ങ പിഴിഞ്ഞ് ജ്യൂസ് തയ്യാറാക്കുന്നത് സമയമെടുക്കുന്ന ജോലിയാണ്. അത്തരം ബുദ്ധിമുട്ടുകൾ ഒഴിവാക്കാൻ വീട്ടിൽ തന്നെ ലെമൺ പൗഡർ തയ്യാറാക്കി സൂക്ഷിച്ചാൽ ആവശ്യമുള്ളപ്പോൾ വളരെ വേഗത്തിൽ ലെമൺ ജ്യൂസ് തയ്യാറാക്കാൻ സാധിക്കും.
ലെമൺ പൗഡർ തയ്യാറാക്കാനായി നല്ല പഴുത്ത നാരങ്ങകൾ തിരഞ്ഞെടുക്കുക. നാരങ്ങയുടെ നീര് മുഴുവൻ പിഴിഞ്ഞെടുത്ത് അളക്കുക. ലഭിക്കുന്ന ഒരു കപ്പ് നാരങ്ങാനീരിന് ഏകദേശം മൂന്ന് കപ്പ് പഞ്ചസാര എന്ന അനുപാതത്തിൽ പഞ്ചസാര ചേർക്കാം. നാരങ്ങാനീര് പരന്ന സ്റ്റീൽ പ്ലേറ്റുകളിലേക്ക് ഒഴിച്ച് അതിലേക്ക് പഞ്ചസാര ചേർത്ത് എല്ലാ ഭാഗത്തും ഒരുപോലെ യോജിപ്പിക്കുക.
ഈ മിശ്രിതം നേരിട്ട് വെയിലത്ത് വെക്കാതെ നല്ല വായുസഞ്ചാരമുള്ള സ്ഥലത്ത് രണ്ട് ദിവസം വരെ ഉണങ്ങാൻ വയ്ക്കുക. ഫാനിന്റെ ചുവട്ടിലോ കാറ്റ് നന്നായി ലഭിക്കുന്ന സ്ഥലത്തോ വയ്ക്കുന്നതാണ് കൂടുതൽ അനുയോജ്യം. പൂർണ്ണമായി ഉണങ്ങിയ ശേഷം മിക്സിയിൽ ഇട്ട് ചെറിയ തരികൾ ഉള്ള പൊടിയായി അരച്ചെടുക്കുക. പിന്നീട് എയർടൈറ്റ് ഗ്ലാസ് ജാറിൽ സൂക്ഷിച്ചാൽ കൂടുതൽ ദിവസം ഉപയോഗിക്കാൻ സാധിക്കും.
ആവശ്യമുള്ളപ്പോൾ ഈ ലെമൺ പൗഡർ വെള്ളത്തിൽ കലക്കി എളുപ്പത്തിൽ ലെമൺ ജ്യൂസ് തയ്യാറാക്കാം. ബാക്കി വരുന്ന നാരങ്ങത്തൊലി ഉപയോഗിച്ച് അച്ചാർ പോലുള്ള വിഭവങ്ങളും തയ്യാറാക്കാനാകുന്നതിനാൽ ഒന്നും പാഴാകാതെ ഉപയോഗപ്പെടുത്താനും സാധിക്കും. ശരിയായ രീതിയിൽ സൂക്ഷിച്ചാൽ ഈ ലളിതമായ തയ്യാറെടുപ്പ് അടുക്കള ജോലികൾ കൂടുതൽ എളുപ്പമാക്കും. credit : cook with shafee