കൊഴുക്കട്ട ഇഷ്ടപ്പെടാത്ത മലയാളികൾ വളരെ കുറവായിരിക്കും. പ്രഭാതഭക്ഷണമായും വൈകുന്നേരത്തെ പലഹാരമായും ഒരുപോലെ കഴിക്കാൻ പറ്റുന്ന ഒരു വിഭവമാണ് ഇത്. മൃദുവായ മാവും മധുരമുള്ള തേങ്ങാ ശർക്കര ഫില്ലിങ്ങും ചേർന്ന കൊഴുക്കട്ടയുടെ രുചി എല്ലാവർക്കും പ്രിയപ്പെട്ടതാണ്. എന്നാൽ വീട്ടിൽ തയ്യാറാക്കുമ്പോൾ പലർക്കും നേരിടുന്ന പ്രധാന പ്രശ്നം കൊഴുക്കട്ട കട്ടിയാകുകയോ കുറച്ച് സമയത്തിനുള്ളിൽ മുറുകിപ്പോകുകയോ ചെയ്യുന്നതാണ്. എന്നാൽ മാവ് തയ്യാറാക്കുന്ന രീതിയിൽ ചെറിയൊരു മാറ്റം വരുത്തിയാൽ മണിക്കൂറുകൾ കഴിഞ്ഞാലും നല്ല മൃദുത്വത്തോടെ കൊഴുക്കട്ട സൂക്ഷിക്കാനാകും. അതുകൊണ്ടുതന്നെ പലരും ഇഷ്ടപ്പെടുന്ന ഒരു എളുപ്പ രീതിയാണ് ഇത്.
ആദ്യം ഒരു പാൻ അടുപ്പിൽ വെച്ച് ആവശ്യത്തിന് വെള്ളം ഒഴിക്കുക. വെള്ളത്തിലേക്ക് ആവശ്യത്തിന് ഉപ്പും ഒരു സ്പൂൺ നെയ്യും ചേർക്കാം. നെയ്യ് ചേർക്കുന്നത് മാവിന് നല്ല രുചിയും മൃദുത്വവും നൽകാൻ സഹായിക്കും. ഇനി കുറച്ച് വറുത്ത അരിപ്പൊടി ഒരു ചെറിയ ബൗളിലേക്ക് മാറ്റി അതിൽ അല്പം വെള്ളം ചേർത്ത് കട്ടകളില്ലാതെ കലക്കി എടുക്കുക. ഈ മിശ്രിതം തിളച്ചുകൊണ്ടിരിക്കുന്ന വെള്ളത്തിലേക്ക് ചേർത്ത് നന്നായി ഇളക്കണം. മിശ്രിതം ഒന്ന് കുറുകി തുടങ്ങുമ്പോൾ ബാക്കി അരിപ്പൊടി ചേർത്ത് എല്ലാം നന്നായി യോജിപ്പിക്കുക. ശേഷം തീ ഓഫ് ചെയ്ത് പാത്രം മൂടി കുറച്ച് സമയം വെക്കാം. ഇതോടെ മാവ് കൂടുതൽ മയമുള്ളതാകുകയും പിന്നീട് കുഴയ്ക്കാൻ എളുപ്പമാവുകയും ചെയ്യും.
ഇതിനിടയിൽ ഫില്ലിങ് തയ്യാറാക്കാം. ഒരു പാനിൽ ശർക്കരപ്പൊടിയും ആവശ്യത്തിന് വെള്ളവും ചേർത്ത് ചൂടാക്കുക. ശർക്കര പൂർണമായി അലിഞ്ഞ ശേഷം ചിരകിയ തേങ്ങ ചേർത്ത് ഇളക്കി യോജിപ്പിക്കണം. വെള്ളത്തിന്റെ അംശം കുറയുന്നതുവരെ ഇളക്കിക്കൊണ്ടിരിക്കുക. ശേഷം ഏലക്കപ്പൊടിയും ചുക്കുപൊടിയും ചേർത്താൽ നല്ല സുഗന്ധം ലഭിക്കും. മിശ്രിതം കട്ടിയായി വന്നാൽ തീ ഓഫ് ചെയ്ത് തണുപ്പിക്കാം. പിന്നീട് ചെറിയ ഉരുളകളാക്കി മാറ്റിവെക്കുക. വേണമെങ്കിൽ അണ്ടിപ്പരിപ്പ് പോലുള്ള ചേരുവകളും ഇതിലേക്ക് ചേർക്കാവുന്നതാണ്. ഇതോടെ കൊഴുക്കട്ടയ്ക്കുള്ള മധുരമുള്ള ഫില്ലിങ് തയ്യാറാകും.
മാവ് ഇളംചൂടുള്ളപ്പോൾ നന്നായി കുഴച്ച് ചെറിയ ഉരുളകളാക്കി എടുക്കുക. ഓരോ ഉരുളയുടെയും നടുവിൽ ചെറിയൊരു കുഴി ഉണ്ടാക്കി തയ്യാറാക്കി വെച്ച ഫില്ലിങ് അതിൽ നിറച്ച് വീണ്ടും അടച്ച് മനോഹരമായ ആകൃതിയിലാക്കാം. ശേഷം ആവിപാത്രത്തിൽ ചെറിയ അളവിൽ നെയ്യോ എണ്ണയോ പുരട്ടി കൊഴുക്കട്ടകൾ നിരത്തി വെക്കുക. ആദ്യം ഉയർന്ന തീയിൽ കുറച്ചുനേരം ആവി വരുത്തിയ ശേഷം മിതമായ തീയിൽ വേവിച്ചാൽ കൊഴുക്കട്ട നല്ല മൃദുത്വത്തോടെ തയ്യാറാകും. ഇങ്ങനെ തയ്യാറാക്കുന്ന കൊഴുക്കട്ട മണിക്കൂറുകൾ കഴിഞ്ഞാലും രുചിയിലും മൃദുത്വത്തിലും വലിയ മാറ്റമില്ലാതെ കഴിക്കാനാകും. credit : Anithas Tastycorner